2000 மார்ச் முதல் 2004 மே வரையிலான காலகட்டத்தில் விகடன் தனது இணையத்தளத்தைச் சொந்த எழுத்துருவில் வெளியிட்டது. அதன் பிறகு TAM எழுத்துருவைப் பயன்படுத்தி வந்தது. பின்னர் 2010 ஜூலை முதல் ஒருங்குறி எழுத்துருவைப் பயன்படுத்தத் தொடங்கியது. தொடக்கத்திலிருந்து ShreeTam எழுத்துருவைப் பயன்படுத்திய தினமலர் 2008க்குப் பிறகு படிப்படியாக ஒருங்குறி எழுத்துருவைப் பயன்படுத்தத் தொடங்கியது.
2004 முதல் 2006 காலகட்டத்தில் அமுதம் என்ற எழுத்துருவைப் பயன்படுத்திய தினகரன் பின்னர் சில காலம் TAM எழுத்துருவைப் பயன்படுத்தி 2009ல் ஒருங்குறிக்கு மாறியது. 2004லிலிருந்து தினமணிக்கென தனியான எழுத்துருவில் வெளிவந்து பின்னர் 2009 ஏப்ரல் 14 முதல் ஒருங்குறிக்கு மாறியது. இதில் சில ஊடகங்களின் உள்பயன்பாடு இன்னும் பழைய எழுத்துருவிலேயே உள்ளது. அவை வெளியிடும் பிடிஎப் கோப்புகளைப் பார்த்தால் இவ்வெழுத்துருவை இன்றும் காணலாம்.
இன்று இணையத்திற்குப் புதிதாக வரும் பெரும்பாலானோர் தமிழ் எழுத்தின் குறியாக்கம்(encoding) பற்றி கவலைப்படத் தேவையில்லை. அந்தளவிற்கு ஒருங்குறி(unicode) முறை பரவிவிட்டது. ஆனால் ஒரு காலத்தில் சுமார் பத்தாண்டுகளுக்கு முன் வரைகூட எந்தக் குறியாக்கத்தில் எழுதுவது என்றும் எந்தக் குறியாக்கத்தைப் படிப்பதென்றும் சிக்கல் நிலவியது. அப்போது எழுதப்பட்ட வலைப்பதிவு முதல் உருவாக்கப்பட்ட வலைப் பக்கங்களை இன்றும் காணலாம். அந்தத் தமிழ்ப் பக்கங்கள் விதவிதமாகக் குறியீடுகளுடன் காணப்படும். அவற்றைப் படிக்கத் தனி எழுத்துருவைத் தரவிறக்கிப் படிப்பார்கள்.
